Web Desk 
കാസർകോട്: ബാരിക്കേഡോ മറ്റു സുരക്ഷാ വേലികളോ ഇല്ലാത്ത ട്രാൻസ്ഫോർമർ അപകടഭീഷണി ഉയർത്തുന്നു. ഏറെ തിരക്കേറിയ എരിയാൽ ബ്ലാർക്കോട് ആസാദ് റോഡിലാണ് മതിയായ സുരക്ഷാ സംവിധാനങ്ങൾ ഇല്ലാതെ ട്രാൻസ്ഫോർമർ സ്ഥാപിച്ചത്. റോഡിനോട് തന്നെ ചേർന്നുനിൽക്കുന്ന തരത്തിലാണ് ട്രാൻസ്ഫോർമർ ഉള്ളത്. ഇതിനുപുറമെയാണ് സ്പീഡ് ഗവർണർ ഇല്ലാത്തതിനാൽ അമിത വേഗത്തിൽ വാഹനങ്ങൾ ഓടിക്കുന്നതും. ഇതും മറ്റുവിധത്തിൽ വലിയ അപകടം വരുത്തിവെക്കാൻ കാരണമാകുന്നു.
ദിവസേന നൂറുകണക്കിന് നാട്ടുകാരും വിദ്യാർഥികളും ഒക്കെ സഞ്ചരിക്കുന്ന വഴിയാണിത്. മദ്രസ, സ്കൂൾ വിദ്യാർത്ഥികൾക്ക് വഴി നടന്നുപോകാൻ മറ്റൊരു മാർഗവുമില്ല. ഈ ഭാഗത്ത് ഒരേ സമയം രണ്ട് വാഹനങ്ങൾ എതിരെ വന്നാൽ കുട്ടികൾ അടക്കമുള്ളവർ ട്രാൻസ്ഫോർമറിന്റെ ഭാഗത്തേക്ക്‌ കയറി നിൽക്കേണ്ടി വരും. ഇതാണ് നാട്ടുകാർക്ക് ആശങ്ക ഉണ്ടാക്കുന്നത്. കഴിഞ്ഞ ദിവസം ഒരു കാർ നിയന്ത്രണം വിട്ട് ഈ ട്രാൻസ്ഫോർമറിൽ ഇടിച്ചുകയറി.
റോഡിനോട് ചേരുന്ന ഭാഗം ആയതിനാൽ ഇവിടെ വാഹനങ്ങളുടെ വേഗത നിയന്ത്രിക്കാൻ സംവിധാനം ഒരുക്കണമെന്ന് നാട്ടുകാർ ആവശ്യപ്പെടുന്നു. അടിയന്തിരമായി സ്പീഡ് ഗവർണർ സ്ഥാപിക്കണം എന്നാണ് പരക്കെയുള്ള ആവശ്യം. ഇക്കാര്യം ചൂണ്ടിക്കാട്ടി നാട്ടുകാരും സന്നദ്ധ സംഘടനകളും അധികൃതർക്ക് നിവേദനം നൽകിയെങ്കിലും നടപടി ഇതുവരെ ഉണ്ടായിട്ടില്ല. കെ എസ് ഇ ബി മുൻകയ്യെടുത്ത് ട്രാൻസ്ഫോർമറിന്റെ ഭാഗത്ത് സുരക്ഷാവേലി കെട്ടണമെന്നും ആവശ്യം ഉയർന്നിട്ടുണ്ട്. മഴക്കാലം കൂടി ആയതോടെ ആകെ ആശങ്കയിലാണ് നാട്ടുകാരും. വലിയൊരു ദുരന്തം വിളിച്ചുവരുത്താതെ ആവശ്യമായ സുരക്ഷാ ക്രമീകരണം ഒരുക്കണമെന്നാണ് നാട്ടുകാരുടെ ആവശ്യം.
