കരിവെള്ളൂർ : സത്യം പറച്ചിലാണ് സാഹിത്യത്തിൻ്റെ ധർമ്മമെന്ന് പ്രശസ്ത കഥാകൃത്ത് സന്തോഷ് ഏച്ചിക്കാനം പറഞ്ഞു. മനുഷ്യന് ഏറ്റവും പ്രയാസമുള്ള കാര്യം സാഹസിക കൃത്യങ്ങൾ കാട്ടലല്ല. 25 അടി ഉയരത്തിൽ നിന്നും താഴോട്ട് തുള്ളുന്നതിനേക്കാൾ പ്രയാസമാണ് സത്യം വിളിച്ചു പറയുന്നത് . പാലക്കുന്ന് പാഠശാല ഗ്രന്ഥാലയത്തിൽ വായനായനത്തിൻ്റെ ഗോൾഡൻ ജൂബിലി ഉദ്ഘാടനം ചെയ്യുകയായിരുന്നു അദ്ദേഹം.
മതമോ ജാതിയോ എന്തായാലും മനുഷ്യന് ദോഷകരമായ തൊന്നും ചെയ്തു കൂട എന്നതായിരിക്കണം സാഹിത്യത്തിൻ്റെ മുദ്ര മോതിരം . എന്നാൽ ചീഞ്ഞളിഞ്ഞ മാംസമെടുത്ത് റോഡിലൂടെ നടന്ന് സമാധിയെന്ന് പറയുന്ന കാലമാണ് നമ്മുടേത്. സന്തോഷ് ഏച്ചിക്കാനം ചൂണ്ടിക്കാട്ടി.
വടക്കുമ്പാട് ടി. സന്തോഷ്കുമാർ – റീന സ്നേഹമുറ്റത്ത് വിദ്യാർഥികളും സ്ത്രീകളുമടക്കം തിങ്ങി നിറഞ്ഞ സദസ്സിൽ പ്രഭാഷകനും സാംസ്കാരിക പ്രവർത്തകനുമായ എം.ശശി മോഹനൻ, കരിവെള്ളൂർ സന്തോഷ് ഏച്ചിക്കാനത്തിൻ്റെ പുതിയ കഥ’ മിസാറു’ പരിചയപ്പെടുത്തി. പിലിക്കോട് ഗവ. ഹയർ സെക്കണ്ടറി സ്കൂൾ പ്രിൻസിപ്പൽ എ രത്നാവതി ടീച്ചർ അധ്യക്ഷയായി. ശാന്താ ജയദേവൻ, കരിവെള്ളൂർ എ.വി. സ്മാരക ഗവ. ഹൈസ്കൂൾ വിദ്യാർഥി അനികേത് , കൊടക്കാട് നാരായണൻ സംസാരിച്ചു. എഴുത്തുകാരൻ മനോജ് ഏച്ചിക്കൊവ്വൽ തൻ്റെ കൊട്ടമ്പാള കഥാ സമാഹാരം സന്തോഷ് ഏച്ചിക്കാനത്തിന് സമ്മാനിച്ചു. ടി. സന്തോഷ് കുമാർ സ്വാഗതവും പി. ഗീത നന്ദിയും പറഞ്ഞു.
Web Desk 
