Web Desk 
പയ്യന്നൂര്‍: കാപ്പാട്ട് പെരുങ്കളിയാട്ടം നടക്കുമ്പോൾ ഫെബ്രുവരി 28ന് രാത്രി സ്കൂട്ടർ മോഷ്ടിച്ച പ്രതിയെ പയ്യന്നൂർ ഡിവൈഎസ്.പി.യുടെ ക്രൈം സ്വകാഡ് തിരൂരിൽ വെച്ച് അറസ്റ്റ് ചെയ്തു. പെരിങ്ങോം കൊരങ്ങാട്ടെ ബത്താലി ഹൗസില്‍ ഫാസിലിനെ(26)യാണ് ഡിവൈഎസ്.പി.കെ.വിനോദ്കുമാറിൻ്റെ നിയന്ത്രണത്തിലുള്ള ക്രൈം സ്ക്വാഡ് അറസ്റ്റ് ചെയ്തത്. എ.എസ്.ഐ.മാരായ ഷിജോ അഗസ്റ്റിൻ, സയ്യിദ് , സീനിയർ സിവിൽ പോലീസ് ഓഫീസർമാരായ നൗഫൽ അഞ്ചില്ലത്ത്, എൻ.എം.അഷറഫ്, സിവിൽ പോലീസ് ഓഫീസർ അബ്ദുൾ ജബ്ബാർ എന്നിവരും മോഷ്ടാവിനെ പിടികൂടിയ സംഘത്തിൽ ഉണ്ടായിരുന്നു.
രാമന്തളി കുന്നരുവിലെ ആകാശിൻ്റെ ഉടമസ്ഥതയിലുള്ള കെ.എൽ.59. വി.0576 നമ്പർ സ്കൂട്ടറാണ് മോഷണം പോയത്. ബന്ധുവായ സിനാജ് കേളോത്തെ ഖാദി ഭവന് മുന്നിൽ നിർത്തിയിട്ടതായിരുന്നു. മോഷണം പോയതിനെ തുടർന്ന് പയ്യന്നൂർ പോലീസിൽ പരാതി നൽകിയിരുന്നു. കേസന്വേഷണം ക്രൈം സ്ക്വാഡ് ഏറ്റെടുത്തതോടെ മോഷ്ടാവിൻ്റെ ദൃശ്യം സമീപത്തെ കെട്ടിടത്തിലെ നിരീക്ഷണ ക്യാമറയിൽ കണ്ടെത്തിയിരുന്നു . ഇതിനിടെ മോഷ്ടിച്ച സ്കൂട്ടറുമായി യാത്ര ചെയ്യുന്നതിനിടെ വാഹന പരിശോധനക്കിടെ തിരൂർ പോലീസ് ട്രാഫിക് നിയമലംഘനത്തിന് പ്രതിക്കെതിരെ പെറ്റികേസ് ചുമത്തിയിരുന്നു .ഈ രേഖകളും അന്വേഷണത്തിൽ വഴിതിരിവായി. പെരിങ്ങോം സ്വദേശിയായ ഇയാൾ മലപ്പുറം തിരൂരിന് സമീപം വിവാഹം കഴിച്ച് കണാരയിലെ ക്വാട്ടേർസിൽ താമസിച്ചു വരികയായിരുന്നു. പോലീസ് സംഘത്തെ കണ്ട് പ്രതി ഓടി തീവണ്ടി കയറി രക്ഷപ്പെടാൻ ശ്രമിക്കുന്നതിനിടെ പിടികൂടുകയായിരുന്നു. സമീപകാലത്തായി ഇയാൾ കോഴിക്കോട്ടെ സ്വകാര്യ സ്ഥാപനത്തിൽ ജോലി ചെയ്തുവരുന്ന വിവരവും പോലീസ് കണ്ടെത്തി. പ്രതിയേയും വാഹനവും പോലീസ് പയ്യന്നൂരിലെത്തിച്ചു. അറസ്റ്റിലായ പ്രതിയെ ഇന്ന് കോടതിയിൽ ഹാജരാക്കും.
