Web Desk 
ഉപ്പ് മൂർച്ചയേറിയ ഒരു രാഷ്ട്രീയ സമരായുധമാണെന്ന് പ്രഭാഷകനും എഴുത്തുകാരനുമായ പ്രൊഫസർ എം .എൻ കാരശ്ശേരി അഭിപ്രായപ്പെട്ടു. കോഴിക്കോട് പ്രസ് ക്ലബ്ബിൽ നാടൻകലാ ഗവേഷണ പാഠശാലയുടെ നാലാമത് സാഹിത്യ ശ്രേഷ്ഠ, കലാശ്രേഷ്ഠ അവാർഡുകൾ വിതരണം ചെയ്തുകൊണ്ട് സംസാരിക്കുകയായിരുന്നു അദ്ദേഹം . സാഹിത്യ ശ്രേഷ്ഠ അവാർഡ് ജേതാവായ സുഭാഷ് ചന്ദ്രൻ്റെ ” ജ്ഞാനസ്നാനം” എന്ന കഥയെ മുൻനിർത്തിയുള്ള സുദീർഘമായ പ്രഭാഷണത്തിലാണ് ഗാന്ധിജി ഉപ്പിനെ എങ്ങനെ സമരായുധമാക്കിയതെന്നും അത് അതി ശക്തമായ നിലയിൽ സുഭാഷ് ചന്ദ്രൻ കഥയിൽ അവതരിപ്പിച്ചതെന്നും വ്യക്തമാക്കുകയായിരുന്നു അദ്ദേഹം. ഗാന്ധിജിക്ക് തുല്യനായി ഗാന്ധിജി മാത്രമേ ഉള്ളൂവെന്ന് അഭിപ്രായപ്പെട്ട അദ്ദേഹം സുഭാഷ് ചന്ദ്രൻ്റ കഥാ ലോകം തുറന്നു വെക്കുന്ന ദേശീയ ബോധത്തെക്കുറിച്ചും വിശദമാക്കി. അവാർഡ് സ്വീകരിച്ചുകൊണ്ട് സുഭാഷ് ചന്ദ്രൻ തൻ്റെ കഥാ വഴികളെക്കുറിച്ചും ജ്ഞാനസ്നാനം അതിൽ വ്യത്യസ്തമാകുന്ന രീതിയെ കുറിച്ചും വ്യക്തമാക്കി. നീണ്ട കാലം എടുത്താണ് ഈ കഥ എഴുതിയത്. കാരണം കഥയെഴുത്തിനായി ഗർഭം ധരിച്ച പ്രമേയം ഗാന്ധിയായിരു ന്നു. എഴുതി ഫലിപ്പിക്കാൻ പറ്റാത്ത ഒരു പ്രഹേളികയാണ് ഗാന്ധിയെന്നും അദ്ദേഹം പറഞ്ഞു. ഓരോ അവാർഡും എഴുത്തുകാരനെ കൂടുതൽ ഉത്തരവാദിത്വ ബോധമുള്ളവനാക്കി മാറ്റുന്നുണ്ടെന്നും അദ്ദേഹം കൂട്ടിച്ചേർത്തു. ഫോക് ലോർ രംഗത്തെ നിരന്തരമായ ഇടപെടൽ പരിഗണിച്ച് അന്തർ ദേശീയ ഫോക് ലോർ ഗവേഷകൻ സജി മാടപ്പാട്ടിന് കലാശ്രേഷ്ഠ പുരസ്കാരവും സമർപ്പിച്ചു. പാഠശാല ചെയർമാൻ ചന്ദ്രൻ മുട്ടത്ത് അധ്യക്ഷത വഹിച്ചു. പ്രോഗ്രാം ഓഫീസർ വത്സൻ പിലിക്കോട്, സെക്രട്ടറി സജീവൻ വെങ്ങാട്ട് എന്നിവർ പ്രസംഗിച്ചു.
