Web Desk 
ശബരിമല തീർത്ഥാടകർക്കായി സ്പെഷൽ ട്രെയിൻ സെപ്റ്റംബർ 28ന് ആരംഭിക്കും. മൂന്നു മാസത്തേക്കാണ് സർവീസ്.ഞായറാഴ്ചകളിൽ ഹുബ്ബള്ളിയിൽ നിന്നും തിങ്കളാഴ്ചകളിൽ കൊല്ലത്ത് നിന്നും സർവീസ് ആരംഭിക്കും.ഒരു എ.സി. ടു ടയർ, രണ്ട് എ.സി. ത്രീ ടയർ, 12 സ്ലീപ്പർ, അഞ്ച് ജനറൽ കോച്ചുകളുണ്ടാകും.ബെംഗളൂരു: ശബരിമല തീർഥാടകർക്കായി ദക്ഷിണ പശ്ചിമ റെയിൽവേ ഹുബ്ബള്ളിയിൽ നിന്ന് കൊല്ലത്തേക്ക് (ബെംഗളൂരു വഴി) വാരാന്ത്യ സ്പെഷൽ ട്രെയിൻ പ്രഖ്യാപിച്ചു. നവരാത്രി, ദീപാവലി, ക്രിസ്മസ് സീസണുകളിൽ നാട്ടിലേക്ക് പോകുന്നവർക്കും ഈ ട്രെയിൻ സർവീസ് ഏറെ ഉപകാരപ്രദമാകും. സെപ്റ്റംബർ 28 മുതൽ ഡിസംബർ 29 വരെ മൂന്നു മാസത്തേക്കാണ് പ്രത്യേക ട്രെയിൻ സർവീസ് നടത്തുക. ഞായറാഴ്ചകളിൽ ഹുബ്ബള്ളിയിൽ നിന്നും തിങ്കളാഴ്ചകളിൽ കൊല്ലത്ത് നിന്നുമായാണ് സർവീസുകൾ ആരംഭിക്കുക.
ഇതിൽ ഒരു എ.സി. ടു ടയർ, രണ്ട് എ.സി. ത്രീ ടയർ, 12 സ്ലീപ്പർ, അഞ്ച് ജനറൽ കോച്ചുകളുണ്ടാകും. ട്രെയിനിന്റെ ഓൺ‌ലൈൻ ടിക്കറ്റ് റിസർവേഷൻ ഇന്ന് ആരംഭിക്കുമെന്ന് റെയിൽവേ അധികൃതർ അറിയിച്ചു. ഹുബ്ബള്ളി-കൊല്ലം സ്പെഷൽ ട്രെയിൻ (നമ്പർ 07313) ഞായറാഴ്ചകളിൽ വൈകീട്ട് 3.15-ന് ഹുബ്ബള്ളിയിൽ നിന്ന് പുറപ്പെട്ട് തിങ്കളാഴ്ച ഉച്ചയ്ക്ക് 12.55-ന് കൊല്ലത്തെത്തും. എസ്.എം.വി.ടി. ബെംഗളൂരുവിൽ രാത്രി 11-നും കെ.ആർ. പുരത്ത് 11.24-നും ബംഗാർപ്പേട്ടിൽ 12.03-നും ട്രെയിൻ എത്തും. അതേസമയം, കൊല്ലം-ഹുബ്ബള്ളി സ്പെഷൽ ട്രെയിൻ (നമ്പർ 07314) തിങ്കളാഴ്ചകളിൽ വൈകീട്ട് അഞ്ചിന് കൊല്ലത്ത് നിന്ന് പുറപ്പെട്ട് ചൊവ്വാഴ്ച വൈകീട്ട് 6.30-ന് ഹുബ്ബള്ളിയിലെത്തും.
ഹാവേരി, ദാവനഗരെ, ബിരൂർ, അരസിക്കരെ, തുമക്കൂരു, എസ്.എം.വി.ടി. ബെംഗളൂരു, കെ.ആർ.പുരം, ബംഗാർപ്പേട്ട്, സേലം, ഈറോഡ്, തിരുപ്പൂർ, പോത്തന്നൂർ, പാലക്കാട്, തൃശൂർ, ആലുവ, എറണാകുളം ടൗൺ, കോട്ടയം, ചങ്ങനാശ്ശേരി, തിരുവല്ല, ചെങ്ങന്നൂർ, മാവേലിക്കര, കായംകുളം, കരുനാഗപ്പള്ളി, ശാസ്താംകോട്ട എന്നിവിടങ്ങളിൽ സ്റ്റോപ്പുകളുണ്ടായിരിക്കും.
