പൗരത്വ ഭേദഗതി നിയമത്തിൽ കോൺഗ്രസിന് നിലപാടില്ല : ഇ പി ജയരാജൻ

കേന്ദ്രത്തിലെ ബി ജെ പി സർക്കാർ കൊണ്ടുവന്ന പൗരത്വ ഭേദഗതി നിയമത്തിന്റെ കാര്യത്തിൽ സ്വന്തമായി ഒരു നിലപാട് എടുക്കാൻ പോലും കഴിയാത്ത പാർട്ടിയായി കോൺഗ്രസ് മാറിയെന്ന് എൽ ഡി എഫ് കൺവീനർ ഇ പി ജയരാജൻ പറഞ്ഞു. കാഞ്ഞങ്ങാട് അസംബ്ലി മണ്ഡലം എൽ ഡി എഫ് യോഗത്തിൽ സംസാരിക്കുകയായിരുന്നു അദ്ദേഹം. പൗരത്വ നിയമം കേരളത്തിൽ നടപ്പിലാക്കില്ലെന്ന് ആദ്യമായി പ്രഖ്യാപിച്ചത് മുഖ്യമന്ത്രി പിണറായി വിജയനാണ്. സി പി എമ്മും ഡിവൈ.എഫ് ഐയും ആണ് നിയമത്തിനെതിരെ കോടതിയിൽ പോയത്. കോൺഗ്രസ് ഇതുവരെ കോടതിയിൽ പോയിട്ടില്ല. ആത്മാർത്ഥമായ നിലപാടുമായി മുന്നോട്ടുപോകുന്ന ഇടതുമുന്നണിയെയും മുഖ്യമന്ത്രിയെയും കുറ്റപ്പെടുത്താനാണ് കോൺഗ്രസ് നേതാക്കൾ സമയം കണ്ടെത്തുന്നത്. ജാതിയുടെയും മതത്തിന്റെയും പേരിൽ ആളുകളെ വിഭജിക്കുന്ന കേന്ദ്ര നയത്തിൽ ന്യുനപക്ഷ സമൂഹം മുഴുവൻ ഭയവിഹ്വലരാണ്. കാസർകോട് പാർലമെന്റ് മണ്ഡലത്തിൽ നിന്നും എൽ ഡി എഫ് സ്ഥാനാർത്ഥി എം വി ബാലകൃഷ്ണൻ റിക്കാർഡ് ഭൂരിപക്ഷത്തിന് ജയിക്കും. മണ്ഡലം തിരിച്ചുപിടിക്കും.അതിനായി മുന്നണി ഒറ്റക്കെട്ടായി പ്രവർത്തിക്കുകയാണെന്നും ഇ. പി ജയരാജൻ പറഞ്ഞു.

കെ. വി കൃഷ്ണൻ അദ്ധ്യക്ഷത വഹിച്ചു. എൽ ഡി എഫ് ജില്ലാ കൺവീനർ കെ. പി സതീഷ് ചന്ദ്രൻ, സി പി എം ജില്ലാ സെക്രട്ടറി സി എച്ച് കുഞ്ഞമ്പു, ഇ. ചന്ദ്രശേഖരൻ എം എൽ എ, സി പി ബാബു, വി കെ രാജൻ, ഗോവിന്ദൻ പള്ളിക്കാപ്പിൽ, അഡ്വ. രാജ്‌മോഹൻ, ഉദിനൂർ സുകുമാരൻ, പി പി രാജു, വെങ്കിടേഷ്, ബി.നന്ദകുമാർ, പ്രമോദ് കരുവളം, ടി. ദേവദാസ്, രാഹുൽ നിലാങ്കര, സ്റ്റീഫൻ ജോസഫ്, കെ സി പീറ്റർ, ബിൽടെക് അബ്ദുള്ള, ഹമീദ് ഹാജി തുടങ്ങിയവർ സംസാരിച്ചു.