നീലേശ്വരം: ചിറപ്പുറം ആലിൻകിഴിലെ നീലേശ്വരം ഇലക്ട്രിസിറ്റി സബ് ഓഫീസിനു മുന്നിൽ നിന്നും വൈദ്യുതി കമ്പി കട്ടു കടത്താൻ ശ്രമിച്ച ഓട്ടോറിക്ഷയും ഓട്ടോറിക്ഷ ഡ്രൈവറെയും പോലീസ് പിടികൂടി. മോഷണ സംഘത്തിൽ ഉണ്ടായിരുന്ന രണ്ട് സ്ത്രീകൾ പോലീസിനെ വെട്ടിച്ച് ഓടി രക്ഷപ്പെട്ടു. ഇന്ന് പുലർച്ചെ രണ്ടു മണിയോടെയാണ് സംഭവം. പട്രോളിങ് നടത്തുകയായിരുന്ന നീലേശ്വരം എസ് ഐ സി കെ മുരളീധരനും സംഘവുമാണ് കയ്യൂർ സ്വദേശിയായ ഓട്ടോറിക്ഷ ഡ്രൈവറെ പിടികൂടിയത്. ആലിൻകീലിലെ മുൻസിപ്പൽ സ്റ്റേഡിയം പരിസരത്തു നിന്നും നായയുടെ കുരകേട്ട് പോലീസ് സംഘം അങ്ങോട്ട് ചെന്നപ്പോഴാണ് ആപ്പ ഓട്ടോറിക്ഷയിൽ നിറയെ വൈദ്യുതി കമ്പിയുമായി ഓട്ടോ ഡ്രൈവറെ പിടികൂടിയത്. പോലീസിനെ കണ്ടപ്പോൾ ഇയാളോടൊപ്പം ഉണ്ടായിരുന്ന രണ്ട് സ്ത്രീകൾ ഇരുളിലേക്ക് ഓടിമറഞ്ഞു. എസ് ഐ യോടൊപ്പം സിവിൽ പോലീസ് ഓഫീസർ ജിതിൻ മുരളി, ദിലീഷ് കുമാർ പള്ളിക്കൈ, ഹോം ഗാർഡ് ഗോപിനാഥൻ എന്നിവരും ഉണ്ടായിരുന്നു. കസ്റ്റഡിയിലെടുത്ത ഓട്ടോറിക്ഷ ഡ്രൈവറെ ചോദ്യം ചെയ്തു വരികയാണ്
Web Desk 
