കാറടുക്ക ബാങ്ക് തട്ടിപ്പ് കേസിൽ പ്രതിയാക്കുമെന്ന് ഭീഷണിപ്പെടുത്തി പണം തട്ടിയ മൂന്നുപേർക്കെതിരെ കേസ്

കോടികളുടെ വെട്ടിപ്പുനടന്ന കാറടുക്ക സർവീസ് സഹകരണ ബാങ്ക് തട്ടിപ്പു കേസിൽ പ്രതിയാക്കുമെന്ന് ഭീഷണിപ്പെടുത്തി വയോധികനിൽ നിന്നും പണം തട്ടിയ മൂന്നുപേർക്കെതിരെ ബേക്കൽ പോലീസ് കേസെടുത്തു. ബേക്കൽ കോട്ടക്ക് സമീപത്തെ അനീസ് മഹലിൽ അബൂബക്കറിൽ (60 )നിന്നും ലക്ഷങ്ങൾ തട്ടിയെടുത്ത ബേക്കൽ സ്വദേശികളായ റാഷിദ്, സമീർ,ഇസ്മായിൽ എന്നിവർക്കെതിരെയാണ് പോലീസ് കേസെടുത്തത്. റാഷിദ് രണ്ട് ലക്ഷത്തി നാൽപതിനായിരം രൂപയും ഇസ്മയിൽ ഒന്നര ലക്ഷം രൂപയുമാണ് തട്ടിയെടുത്തത്. വീണ്ടും പണം ആവശ്യപ്പെടുകയും തന്നില്ലെങ്കിൽ കൊല്ലുമെന്ന് ഭീഷണിപ്പെടുത്തുകയും ചെയ്തതിനെ തുടർന്നാണ് അബൂബക്കർ പോലീസിൽ പരാതി നൽകിയത്.