Web Desk 
നാലരലക്ഷം രൂപയ്ക്കു പലിശയുള്‍പ്പെടെ 36 ലക്ഷത്തിലധികം തിരിച്ചടച്ചിട്ടും മൂന്ന് ലക്ഷം കൂടി നല്‍കണമെന്ന് ആവശ്യപ്പെട്ട് ഭീഷണി പെടുത്തിഎന്ന യുവതിയുടെ പരാതിയില്‍ രണ്ടു പേർക്കെതിരെ പയ്യന്നൂര്‍ പോലീസ് കേസെടുത്തു. കോറോം കൊക്കോട്ട് എ.സിന്ധുവിന്റെ പരാതിയിലാണ് ചെറുകുന്ന് ചിടങ്ങില്‍ പള്ളിച്ചാലിലെ വിലക്രിയന്‍ ഹൗസില്‍ ഷൈനി, പാപ്പിനിശ്ശേരി എല്‍.പി. സ്‌കൂളിന് സമീപത്തെ പയ്യനാടന്‍ ഹൗസില്‍ രാജേഷ് എന്നിവര്‍ക്കെതിരെ വഞ്ചനാകുറ്റം, മോഷണം ഉൾപ്പെടെയുള്ള വകുപ്പുകൾ പ്രകാരം പോലീസ് കേസെടുത്തത്.
2022 ആഗസ്ത് മാസത്തിൽ ബ്ലാങ്ക് ചെക്കുകളുടെ ഉറപ്പിൽ രണ്ടു തവണകളായി നാലര ലക്ഷം രൂപ പരാതിക്കാരി പ്രതികളില്‍നിന്നും പലിശക്ക് വാങ്ങി. അതിനിടയില്‍ കഴിഞ്ഞ വര്‍ഷം ഫെബ്രുവരിയില്‍ പ്രതികളെ കാണുന്നതിനായി തളിപ്പറമ്പിലെത്തിയപ്പോള്‍ പരാതിക്കാരിയുടെ ബാഗിലുണ്ടായിരുന്ന ഒപ്പിട്ട ബാങ്ക് ചെക്ക് ലീഫുകള്‍ പ്രതികള്‍ മോഷ്ടിക്കുകയും അതുപയോഗിച്ച് മൂന്നുലക്ഷം രൂപകൂടി നൽകണമെന്ന് ആവശ്യപ്പെട്ട് ഭീഷണിപ്പെടുത്തുന്നതായുംപരാതിയിൽ പറയുന്നു.
